Jagaran Nepal बिहिबार, मंसिर ०४, २०७७

काठमाडौं । यस्तो दिन कहिलै कसैकोपनि नओस् । कमाउन हङकङ पुगेका ७ जना नेपालीको एकैपटक निधन भएको छ । यो खबरले नेपाल र प्रवासमा रहेका नेपालीहरु स्तब्ध भएका छन् । जन्मदिन मनाउने क्रममा फैलिएको आगलागीबाट ज्यान गुमाएका ७ जनाकै परिचय खुलेको छ ।

हङकङको एक रेस्टुरेन्टमा आइतबार राति भएको आगलागीमा सात नेपालीको मृत्यु भएको थियो । मृतकमध्ये एकै परिवारका चार जना पनि रहेका छन् । जन्मदिनको पार्टी मनाइरहँदा क्यान्टोन रोडस्थित रेस्टुरेन्टमा सो घटना भएको हो ।

एकै परिवारका ४ जनाहरुमा बागलुङको काठेखोला गाउँपालिका–६ का ३८ वर्षीय युवराज कँडेल, उनकै १३ वर्षकी छोरी कृतिका, युवराजकै बहिनीज्वाइँ ३५ वर्षका राजबाबु नेपाल र उनका ९ वर्षका छोरा रायन रहेका छन् । युवराजका दाइ भने क्यानडाबाट हङकङ गएर क्वारेन्टाइनमा बसेकाले घटनाबाट जोगिन सफल भएका हुन् ।

मृतक कँडेलका बाबुआमा पनि एक महिनादेखि हङकङ जाने तयारीमा थिए । तर कोरोना महामारीका कारण जान पाएनन् । घटनामा उनीहरूकै नाताका १८ जना घाइते भएका छन् । घटनामा सागर कँडेलसहित उनको परिवारका अरू तीन जना पनि गम्भीर अवस्थामा छन् ।

तीन दिनदेखि उनीहरूको होस नखुलेको बताइएको छ । घाइतेहरूको स्थानीय अस्पतालमा उपचार भइरहेको छ । आगलागीमा परेर ज्यान गुमाउने थप तीन जना शेरबहादुर गुरुङ, अनिता निरौला र विनिता तामाङ रहेका छन् । आगलागीको कारण अहिलेसम्म खुलेको छैन ।