Jagaran Nepal आइतबार, साउन ३२, २०७७

नेपालमा १० चैतमा दोस्रो संक्रमित भेटिए लगतै प्रदेश १ सरकारले कोशी अस्पतालमा कोभिड-१९ उपचार केन्द्र बनाएको थियो । चैत तेस्रो साताबाट सञ्चालनमा आएको यो उपचार केन्द्रमा २४५ जना संक्रमित भर्ना भए, र निको भए । हाल त्यहाँ उपचाररत ५४ जना संक्रमितमध्ये अधिकांशको अवस्था सामान्य छ ।

जब गम्भीर समस्या भएका संक्रमित आएनन्, प्रदेश सरकारले आईसीयू र भेन्टिलेटर जडान गर्ने आफ्नै प्रतिवद्धता विर्सियो । गोल्डेन अस्पताल र न्यूरो अस्पतालबाट सापटीमा लिएको दुईवटा र दाताले उपलब्ध गराएको चारवटा मेसिन गोदाममा थन्किएको छ । संक्रमितलाई भने अक्सिजन दिन समस्या भएको छ ।

आईसीयू सञ्चालनका लागि दक्ष जनशक्तिको पनि अभव रहेको कोशी अस्पतालका मेसु चुमनलाल दासले बताए । ‘हाम्रो योजना चाँडोभन्दा चाँडो आईसीयू सुरु गर्ने हो, तर हामीसँग जनशक्ति छैन’ उनले भने, ‘जनशक्ति नहुँदा गाह्रो हुन्छ ।’