Jagaran Nepal आइतबार, साउन २५, २०७७

जो व्यक्ति हरेक सानोऽ–ठूलो कामका लागि अरुको मद्दतमा निर्भर हुन्छन्, उनीहरुको आत्मविश्वास कमजोर हुने गर्दछ । यस्ता व्यक्तिले कहिले पनि आफ्नो निर्णय लिन सक्दैनन् र समस्याको सामना गर्छन् । यस्तो बानीबाट बच्नुपर्छ । महाभारतमा दुर्योधन मामा शकुनीमाथि निर्भर थिए । शकुनीको गलत सल्लाहका कारण पूरा कौरव वंश नाश भयो ।

अरुको सल्लाहमा अत्यधिक निर्भर नहुनुहोस्ः

महाभारतमा दुर्योधन हरेक कामका लागि आफ्ना मामा शकुनीसँग सल्लाह लिन्थे । यसै कारण दुर्योधन स्वविवेकले निर्णय लिन सक्दैनथे । र उनी पूर्ण रुपमा मामा शकुनीको इशारामा हिँड्न थाले । शकुनीले दुर्योधनमार्फत् ती सबै काम गराए जुन उनी गर्न चाहन्थे । शकुनी भीष्म पितामहको वंशलाई समाप्त गर्न चाहन्थे र यसै कारण उनी हस्तीनापुर आएका थिए । भीष्म पितामहले शकुनीकी बहिनी गान्धारीको विवाह दृष्टिविहिन धृतराष्टसँग गराइदिए । शकुनी यसको बदला लिन चाहन्थे त्यसकारण उनी हस्तिनापुर आएका थिए ।

अरुको सल्लाहले मद्दत त पाइन्छ तर हरेक कामका लागि अरुको सल्लाह लिने हाम्रो बानीले हाम्रो आत्मविश्वासलाई क्रमशः कमजोर बनाइरहेको हुन्छ । हामी स–साना कामका लागि पनि अरुमा निर्भर हुन थाल्छौं जुन समस्याको कारण बन्ने गर्छ । अरुको सल्लाह लिने बानी बसेपछि जतिबेला कुनै काम गर्छौं मनमा शंका उब्जने गर्छ । शंकाका कारण सही ढंगले काम पूरा हुन सक्दैन र असफलता हात लाग्छ ।

राम्रो कामबाट पाइन्छ सुखः

गलत काम गर्ने व्यक्तिले केही समयका लागि सुख प्राप्त त गर्लान् तर उनीहरु सधैं सुखी हुन सक्दैनन् । दुर्योधनले छल गरेर गलत तरिकाले पाण्डवको सबै धन सम्पत्ति खोसे तर त्यो सम्पत्ति टिक्न सकेन । त्यसकारण आफ्नो सुखका लागि अरुलाई कुनै पनि अवस्थामा छल गर्नुहुँदैन ।