Jagaran Nepal आइतबार, जेठ ३२, २०७७

अबदेखि लामो तथा छोटो दूरीका सार्वजनिक यातायातपनि सञ्चालन हुने भएको छ । यातायात व्यवसायी राष्ट्रिय महासंघका महासचिव सरोज सिटौलाले सार्वजनिक यातायात पनि चल्ने जानकारी दिएका छन् । बिहीबार राति प्राईम टाईम्स टेलिभिजनबाट प्रशारण भएको जनता जान्न चाहन्छन् कार्यक्रमममा बोल्दै सिटौलाले यस्तो बताएका हुन् ।

महानगरीय ट्राफिक महाशाखाका प्रमुख भीम प्रसाद ढकालले लकडाउन प्रभावकारी रुपमा कार्यान्वयन भैरहेको र सार्वजनिक यातायात सञ्चालन हुन नदिएको स्पष्ट पारेका छन् । लकडाउन उल्लंघन गरेकोमा हिजोमात्रै १७ सय गाडी होल्ड गरिएको उनले सुनाए ।

यो पनि विजयपुर खोलामा मोटरेवल पुल

काठमाडौँ, ३२ जेठ । पोखरा महानगरपालिका–१३ र मादी गाउँपालिका–५ जोड्ने विजयपुर खोलामाथिको मोटरेवल पुल निर्माण अन्तिम चरणमा पुगेको छ ।

काउँखोला, सिक्लेस, दूधपोखरी सडकखण्डमा पर्ने सो पुल सङ्घीय सरकारको रु पाँच करोड ६५ लाख लागतमा निर्माण गरिएको हो । नेपाल कम्युनिष्ट पार्टी (नेकपा) का अध्यक्ष एवं पूर्वप्रधानमन्त्री पुष्पकमल दाहाल (प्रचण्ड)ले विसं २०७५ मङ्सिरमा शिलान्यास गरिएको सो पुल निर्माणको ठेक्का रायमाझी द क्याराभान जेभी काठमाडौँ ठेकेदार कम्पनीले पारेको थियो ।

डबल स्पान प्रविधिबाट निर्मित ५७ मिटर लम्बाइ र ११ मिटर चौडाइको सो पुलको दायाँबायाँ रेलिङ राख्ने र पैदलमार्गको काम मात्र बाँकी छ । असार मसान्तसम्ममा सम्पूर्ण काम सम्पन्न हुने ठेकेदार कम्पनीका इञ्जीनियर विजय थकालीले जानकारी दिएका छन् ।

पुलको पूर्वउत्तरको भागमा रु दुई करोड लागतमा लगभग ४०० मिटर लम्बाइमा ग्याभिन तारजाली भर्ने काम भइरहेको छ । तारजालीबाट मोटरेवल पुलसँगै स्थानीय फाँटको समेत संरक्षण हुने प्रदेशसभा सदस्य मनबहादुर गुरुङले बताएका छन् । उनका अनुसार काउखोलाबाट पर्यटकीय गाउँ सिक्लेस हुँदै हिमालपारिको जिल्ला मनाङ जोड्ने सो सडकखण्डअन्तर्गत नवनिर्मित पुलदेखि १० किलोमिटर बाटो निर्माण भइरहेको छ ।

प्रदेश सरकारको रु २२ करोड ५० लाख लागतमा निर्माण भइरहेको सो बाटोको स्तरोन्नति गरी कालोपत्र गर्ने कार्यक्रम रहेको उनले बताएका छन् । बाँकी झण्डै ७० किलोमिटर सो सडक क्रमागतरूपमा निर्माण गरिने कार्यक्रम रहेको उनको भनाइ छ । पक्की पुल निर्माणसँगै बाह्रै महिना यातायातको सुविधा पुग्ने बताउँदै प्रदेशसभा सदस्य गुरुङले बाटोको स्तरोन्नतिसँगै मादी गाउँपालिकाका स्थानीय बासिन्दाको आयआर्जनसमेत वृद्धि हुने विश्वास व्यक्त गरेका छन् ।