Jagaran Nepal बुधबार, चैत्र २३, २०७८

काठमाडौं ।

प्रधानमन्त्री शेरबहादुर देउवा सहमत भएमा २०७९ सालदेखि सातामा शनिबार र आइतबार सार्वजनिक बिदा दिने व्यवस्था लागू हुने भएको छ ।

आइतबार जनार्दन शर्माले बोलाएको बैठकमा २०७९ सालदेखि शनिबार र आइतबार सार्वजनिक बिदा दिने विषयमा सहमति जुटेका हो । अर्थमन्त्री शर्माले बोलाएको बैठकमा प्रधानमन्त्री कार्यालयका राज्यमन्त्री उमेश श्रेष्ठ तथा योजना आयोगका उपाध्यक्ष डा विश्व पौडेल,राष्ट्र बैंकका गभर्नर महाप्रसाद अधिकारी सहभागी थिए ।

छलफलमा अर्थ मन्त्रालयका सचिवहरु मधु मरासिनी तथा राजस्व सचिव कृष्णहरि पुस्कर थिए । वाणिज्य मन्त्रालयका सचिव गणेश पाण्डे थिए । आन्तरिक राजस्व विभागका महानिर्देशक रितेश शाक्य र भन्सार विभाग कमल भट्टराई सहभागी थिए ।

बैठकमा वाणिज्य मन्त्रालयका सचिव पाण्डेले शनिबार र आइतबार बिदा दिनुपर्ने प्रस्ताव गरेका थिए । पेट्रोलियम पदार्थको मूल्य निकै बढेको र दिन सार्वजनिक बिदा दिएमा पेट्रोलियम पदार्थको खपत घट्ने प्रस्ताव गरेका थिए ।

अर्थमन्त्रीले बोलाएको उच्च स्तरीय बैठकमा शनिबार र आइतबार सार्वजनिक बिदा दिने विषयमा सहमति भएको र यसलाई अर्थमन्त्री शर्माले मन्त्रिपरिषद्मा लग्ने सहमति भएको छ । ‘प्रधानमन्त्री सहमति भएमा २०७९ सालदेखि सातामा दुईदिन सार्वजनिक बिदा दिने निर्णय कार्यान्वयनमा आउने छ,’बैठकमा सहभागी एक अधिकारीले भने ।

बैठकमा प्रधानमन्त्री देउवा निकट भनिएका राज्यमन्त्री श्रेष्ठ र उपाध्यक्ष पौडेल समेत दुईदिन बिदामा सकारात्मक देखिएका हुँदा यो निर्णय कार्यान्वयनमा आउने सम्भावना बलियो छ । सुरुमा ३ महिना परिक्षण गरेर हेर्ने यसले सार्वजनिक सेवामा समस्या नआएमा र पेट्रोलियम पदार्थको खपत घटेको देखिएमा निर्णय लागू हुने बैठकका सहभागीले जानकारी दिए ।

‘विदेशी मुद्राको सञ्चिती जोगाउन ३ महिनालाई निर्णय परिक्षण गरेर हेनुपर्नेमा सबै सहभागीको सहमति रह्यो,प्रधानमन्त्री सहमत भएमा निर्णय कार्यान्वयन हुन्छ,’बैठका एक सहभागीले भने । विगतमा काठमाडौं उपत्यकामा शनिबार र आइतबार सार्वजनिक बिदा दिने निर्णय भने कार्यान्वयन भएको थियो । दुईदिन सार्वजनिक बिदा दिएमा कार्यालय समय भने ९ बजेदेखि सुरु हुने छ । क्लिककाठमाडौं

एस. एण्ड एस. मिडिया प्रा. लि.द्धारा संचालित

सूचना विभाग दर्ता नंः
ठेगानाः घोराही उपमहानगरपालिका-१७ घोराही, दाङ
सम्पर्क: [email protected]/९८०३१५५५३१